MİDA evləri bazarda mənzilləri ucuzlaşdıracaq? - Ekspertdən CAVAB

Mənzil İnşaatı Dövlət Agentliyinin (MİDA) sərəncamında olan mənzillərin növbəti satışı başlayıb. Mənzillərin satışı bu gün - sentyabrın 4-də saat 11:00-dan etibarən həyata keçirilir.

Bəs MİDA nələri edib və nələri nəzərdə tutub?

BAKU.WS bildirir ki, mövzu ilə bağlı Baku TV-yə əmlak məsələləri üzrə ekspert Ramil Osmanlı açıqlama verib.

O bildirib ki, MİDA xətti ilə inşa olunan mənzillər xüsusi kateqoriyaya aid şəxslərə verilir. Həmin şəxslərlə müqavilələrin bağlanması zamanı müəyyən söhbətlər aparılır və onlar müvafiq qaydalar barədə məlumatlandırılırlar:

"Həmin mənzillərin ən yaxşı halda qısa müddət ərzində yenidən satışa çıxarılması mümkün olmur. Qanunvericiliklə buna icazə verilmir. Ona görə də qarşıdakı illərdə MİDA xətti ilə Bakı şəhərində və regionlarda yeni mənzillərin satışı həyata keçiriləcək. Amma nəzərə almaq lazımdır ki, həmin mənzilləri alan şəxslər sonrakı mərhələdə, yəni təkrar bazarda o mənzilləri satışa çıxararkən artıq MİDA kimi, dövlət kimi davranmayacaqlar. Burada qiymət artıq bazara uyğun müəyyənləşdiriləcək. Ona görə də MİDA-nın ortaya qoyduğu ucuz evlər konsepsiyasının fonunda bazarda mənzillərin ucuzlaşmasını gözləmək doğru olmaz".