Əhalini SEVİNDİRƏCƏK XƏBƏR - Bu həftədən başlayır...

"Noyabrın 15-dən ölkə üzrə istilik mövsümü başlayır. Hazırda istilik sistemlərinin sazlanması və sınaq işləri yekunlaşmaq üzrədir".

Bu barədə BAKU.WS-in sorğusuna cavab olaraq "Azəristiliktəchizat" ASC-nin mətbuat katibi Elvin Basqallı bildirib.

Onun sözlərinə görə, bu il ölkədə təxminən 3800 yaşayış binası, 449 təhsil müəssisəsi, 152 səhiyyə obyekti və 2500 sosial-təsərrüfat təyinatlı bina istiliklə təmin ediləcək:

"İstilik sistemlərinin təhlükəsiz və fasiləsiz fəaliyyəti üçün "Azəristiliktəchizat" ASC tərəfindən avadanlıqların texniki baxışı, nasos və qazanxana avadanlıqlarının sınaqdan keçirilməsi həyata keçirilib".

Qeyd edək ki, noyabrın 1-də respublikanın 14 dağlıq və dağətəyi rayon və şəhərlərində istilik mövsümü başlayıb. Aprelin 15-də bütün ölkə üzrə istilik mövsümü yekunlaşacaq. Mayın 1-də isə 14 dağlıq və dağətəyi rayon və şəhərdə mövsüm sona çatacaq.

Orxan Hüseyn