Ağdaş sakinləri əkin sahələrinə gedərkən cərimə olunurlar?

Ağdaş rayonunun Şəmsabad kəndinin sakinləri özlərinə məxsus pay torpaqlarına gedə bilmədiklərini deyillər.

Əraziyə daxil olmaq üçün nişanlanma xətti olmadığından ya cərimələnirlər, ya da bir neçə kilometr artıq məsafə qət etməli olurlar.

Təsərrüfat sahiblərinin Xəzər TV-yə dediklərindən aydın olur ki, əvvəllər qırıq-qırıq xətt olduğu üçün yük maşınları ilə əraziyə rahat şəkildə daxil olmaq olurdu. Artıq həmin xətlər düz xətt ilə əvəz olunub, nəticədə ağır texnikanın əkin sahələrinə girişi çətinləşib.

Xüsusilə biçin və məhsul yığımı dövründə daha da qabarıq hiss olunur.

Məsələ ilə bağlı Azərbaycan Yerüstü Nəqliyyat Agentliyindən (AYNA) bildirilib ki, sözügedən ərazidə qəza riskləri nəzərə alınaraq düz xətt çəkilib.

Həmçinin Şəmsabad kəndinin giriş hissəsində 15 metr məsafədə qırıq-qırıq xətt çəkilib. Qoşqulu nəqliyyat vasitələrinin sürücüləri bu yol vasitəsilə sola dönə bilərlər.