Tanınmış tiktoker "Koti" məsuliyyətə cəlb olundu

Sosial şəbəkələrdə "Koti" kimi tanınan fenomen məsuliyyətə cəlb olunub.

BAKU.WS teleqraf-a istinadən xəbər verir ki, tiktoker qanunsuz qumar oyunlarını təbliğ etdiyi üçün hakim qarşısına çıxarılıb.

Nərimanov Rayon Məhkəməsində keçirilən prosesdə 25 yaşlı tiktoker özünü təqsirli bilərək əməlini etiraf edib. O, 2023-2025-ci illərdə özünə məxsus "Instagram" hesabında qanunsuz mərc saytlarını reklam etdiyini, bunu bir daha təkrarlamayacağını bildirib.

Hakim Tural Musayevin sədrliyi ilə keçirilən prosesdə "Koti" İnzibati Xətalar Məcəlləsinin 388-1.1.1-ci maddəsi üzrə təqsirli bilinib və o, 600 manat məbləğində cərimə edilib.

Qeyd edək ki, onunla bağlı protokolu Daxili İşlər Nazirliyinin Kibercinayətkarlıqla Mübarizə Baş İdarəsi tərtib edib.