FHN-in Cənub Regional Mərkəzində mülki müdafiə məşqi keçirilib

Fövqəladə Hallar Nazirliyinin Cənub Regional Mərkəzi tərəfindən "Qafqaz Konserv Zavodu" MMC Lənkəran Konserv Fabrikində "Fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə edilməsinin təşkili" mövzusunda nümunəvi obyekt mülki müdafiə məşqi keçirilib.

Nazirliyin Mətbuat xidmətindən BAKU.WS-ə verilən xəbərə görə, məşqdə FHN-in Cənub Regional Mərkəzinin əməkdaşları, "Qafqaz Konserv Zavodu" MMC Lənkəran Konserv Fabrikinin mülki müdafiə qərərgahının, fövqəladə hallar komissiyasının üzvləri və mülki müdafiə dəstələri iştirak ediblər.

Məşqin keçirilməsində əsas məqsəd müəssisənin mülki müdafiə planının reallığının, rəhbər və komandir-rəis heyətinin fövqəladə hadisələrlə bağlı hazırlıq səviyyəsinin yoxlanılması, müəssisə personalının fövqəladə hallarla mübarizə üzrə bilik və bacarıqlarının təkmilləşdirilməsi olub.

Məşq zamanı rəhbər heyət tərəfindən yaranmış şərti ekstremal vəziyyətlə əlaqədar idarəetmənin təşkili üzrə fəaliyyəti qiymətləndirilib, funksional vəzifələrlə bağlı məruzələr dinlənilib, "fövqəladə hadisə" ilə mübarizə tədbirləri reallaşdırılıb.

Uğurla keçən məşqdən sonra əldə edilmiş nəticələr müzakirə olunub, aidiyyəti üzrə tapşırıqlar verilib.

Qalereya