055 213 76 73
Bakıda narkotik vasitə istifadəsində və satışında ittiham edilən gənclərin məhkəməsi keçirilib.
BAKU.WS “ölkə.az”a istinadən xəbər verir ki, Bakı Ağır Cinayətlər Məhkəməsində narkotik vasitələrin qanunsuz dövriyyəsində və satışında təqsirləndirilən 1990-cı il təvəllüdlü Azəri Mirsaleh Etibar oğlu və 1992-ci il təvəllüdlü Həmzəliyev Tehran Həmzəli oğlunun cinayət işi üzrə məhkəmə iclası keçirilib.
Hakim Azad Məcidovun sədrliyi ilə keçirilən məhkəmə iclasında dövlət ittihamçısı çıxış edib. Prokuror hər iki şəxsin 6 il müddətinə azadlıqdan məhrum edilməsini istəyib. Dövlət ittihamçısı həmçinin hər iki şəxsin narkomaniyadan məcburi müalicəyə göndərilməsini istəyib.
Məhkəmədə təqsirləndirilən şəxslərin vəkilləri müdafiə çıxışı ediblər. Vəkillər hüquqlarını müdafiə etdikləri şəxslər barəsində yüngül cəza təyin edilməsini istəyiblər. Təqsirləndirilən şəxslər də vəkilləri ilə razı olduqlarını deyiblər.
Müşavirədən sonra hökm elan edilib. Hökmə əsasən Mirsaleh Azəri və Tehran Həmzəliyevin hər biri 5 il müddətinə azadlıqdan məhrum ediliblər. Onlar barəsində narkomaniyadan məcburi müalicə qərarı çıxarılıb.
İttihamda yazılır ki, polis əməkdaşları əməliyyat məlumatı əsasında Mirsaleh Azərinin maşınına baxış keçiriblər. Maşının oturacağının altında bükümdə narkotik vasitə aşkar edilərək götürülüb.
Elan edilmiş ittihamla Mirsaleh Azəri özünü qismən təqsirli bilib. O deyib ki, narkotik vasitənin satışı ilə məşğul olmur. Müttəhim maşından tapılan narkotiki tanımadığı şəxsdən aldığını bildirib.
Taksi fəaliyyəti ilə məşğul olduğunu deyən Mirsaleh maşınına minən müştərinin həmin narkotiki ona verdiyini deyib: “Pulu yox idi. Əvəzində narkotik verdi”.
İnternat evində böyüdüyünü deyən Mirsaleh özünə maşın aldığını və taksi sürdüyünü deyib: “Dost-tanış kömək eləyib. Bir az da özüm işləyib yığmışdım. 1800 manata “Opel” almışdım. Köhnə maşın idi, düzəldib sürdüm”.
Narkotik vasitədən istifadə etdiyini etiraf edən Mirsaleh sualları cavablandırıb. O, sonuncu dəfə narkotik vasitəni Kürdəxanıda iştirak etdiyi toy məclislərindən birində qəbul etdiyini söyləyib:
“Kəndlərdə olur, toyda meyxana deyəndə gətirənlər olur. Orda uşaqlardan alıb çəkmişəm. Kimdən aldığımı bilmirəm”.
Digər təqsirləndirilən Tehran Həmzəliyev özünü təqsirli bilmədiyini deyib. O deyib ki, Mirsalehlə dost olub, onun maşınına minəndə polis əməkdaşları hər ikisini saxlayıb.
Qeyd edək ki, hər iki şəxsə qarşı Cinayət Məcəlləsinin 234.4.1. (Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama;
qabaqcadan əlbir olan bir qrup şəxs tərəfindən və ya mütəşəkkil dəstə tərəfindən törədildikdə;) və 234.2. (Satış məqsədi ilə qanunsuz olaraq narkotik vasitələri və ya psixotrop maddələri əldə etmə və ya saxlama, hazırlama, istehsal etmə, emal etmə, daşıma, göndərmə, yaxud qanunsuz olaraq narkotik vasitələri və ya psixotrop maddələri satma) maddələri ilə ittiham irəli sürülüb.
BAKU.WS