"Volqa-Dnepr"ə məxsus An-124 məsələsi Kanadada hələ məhkəmədədir

Rusiyanın Ottavadakı səfiri Oleq Stepanov bildirib ki, müsadirə edilmiş An-124 "Volqa-Dnepr" təyyarəsi ilə bağlı məsələ hələ də Kanada məhkəmələrində araşdırılır.

BAKU.WS xəbər verir ki, diplomat bu barədə RİA Novosti agentliyinə müsahibəsində danışıb.

Onun sözlərinə görə, Moskvanın mövqeyi dəyişməz olaraq qalır və Rusiya təyyarənin ələ keçirilməsini qəsdən atılmış addım kimi qiymətləndirir. Stepanov qeyd edib ki, Rusiya dövləti məhkəmə prosesində birbaşa iştirak etmir və hüquqi detalları şərh etmir.

Səfir bildirib ki, Kanadanın birtərəfli müsadirə qərarı qəbuledilməzdir və bu məsələ ilə bağlı rəsmi Ottavaya dəfələrlə prinsipial mövqe çatdırılıb. Onun iddiasına görə, Kanada tərəfi əvvəlcə təyyarəni ölkəyə cəlb edib, daha sonra isə saxlanılması üçün hüquqi əsaslar formalaşdırıb.

Qeyd edək ki, 2022-ci ilin fevralında Kanada Rusiya aviaşirkətlərinə hava məkanından istifadəni qadağan edib. Həmin qərardan sonra "Volqa-Dnepr" şirkətinə məxsus Antonov An-124 tipli yük təyyarəsi Torontoda bloklanıb. Təyyarə Kanada hökumətinin sifarişi ilə Çindən COVID-19 test dəstlərini daşıyırdı.