Qvatemalada 3 min illik Maya şəhəri qalıqları tapılıb

Qvatemalanın şimalındakı meşəlik ərazidə təxminən 3 min il əvvələ aid qədim bir Maya şəhəri aşkar edilib. Arxeoloqlar bildiriblər ki, piramidalar və monumental tikililərlə zəngin olan bu ərazi dövrünün əsas mərasim mərkəzlərindən biri olub.

BAKU.WS xəbər verir ki, Qvatemala Mədəniyyət Nazirliyinin məlumatına görə, "Los Abuelos" (ispancadan tərcümədə "Böyük babalar") adlandırılan bu qədim şəhər Peten bölgəsində, Uaxactun arxeoloji ərazisindən 21 kilometr şimalda yerləşir.

Şəhərin eramızdan əvvəl 800-500-cü illərə, yəni Orta Preklassik dövrə aid olduğu bildirilib. Rəsmilər hesab edir ki, bu ərazi Maya sivilizasiyasının ən qədim və əhəmiyyətli mərasim mərkəzlərindən biri ola bilər. Bildirilib ki, bölgədə yerli ikonoqrafiya ilə bəzədilmiş piramidalar və abidələrlə yanaşı, diqqətəlayiq memarlıq planlaması mövcuddur.

Şəhərə adını verən əsas tapıntılardan biri isə ata ruhlarını təmsil etdiyinə inanılan iki insanabənzər heykəldir. Bu heykəllərin eramızdan əvvəl 500-300-cü illərə aid olduğu və ata ibadəti ilə əlaqəli ola biləcəyi düşünülür.

Ümumi sahəsi 16 kvadrat kilometr olan "Los Abuelos" şəhəri Qvatemala və Slovakiya arxeoloqlarının apardığı qazıntılar zamanı aşkar edilib. Şəhərdə həmçinin 33 metr hündürlüyündə piramida, Preklassik dövrə aid divar rəsmləri və unikal kanal sistemi müəyyən edilib.

Nazirliyin açıqlamasında qeyd olunub ki, Los Abuelosla yanaşı, yaxınlıqda yerləşən daha iki qədim yaşayış məntəqəsi birlikdə əvvəllər məlum olmayan "şəhər üçbucağı" meydana gətirir. Bu kəşflərin Peten bölgəsindəki Maya mədəniyyətinin mərasim və ictimai-siyasi quruluşuna dair mövcud bilikləri yenidən formalaşdıra biləcəyi vurğulanıb.