İngiltərə Nigeriyaya 420 milyon funt-sterlinq təzminat ödəyəcək

Nigeriyanın Enuqu əyalətində məhkəmə 1949-cu ildə İngilis müstəmləkə idarəçiliyi tərəfindən öldürülən 21 kömür mədənçisinin ailələrinə ümumilikdə 420 milyon funt-sterlinq təzminat ödənilməsi barədə qərar çıxarıb.

BAKU.WS Nigeriya Xəbər Agentliyinin (NAN) məlumatına istinadən xəbər verir ki, Enuqu Əyaləti Ali Məhkəməsinin hakimi Antoni Onovo İngiltərə hökumətinin hər bir qurban üçün 20 milyon funt-sterlinq olmaqla təzminat ödəməsinə və ailələrdən yazılı, qeyd-şərtsiz üzr istəməsinə hökm edib.

Hakim bildirib ki, mədənçilərin öldürülməsi yaşamaq hüququnun qanunsuz və məhkəməsiz şəkildə pozulmasıdır və bu hadisəyə görə İngilis müstəmləkə idarəçiliyi birbaşa məsuliyyət daşıyır.

Qərara əsasən, təzminat 90 gün ərzində ödənilməli, gecikmə halında isə illik 10 faiz faiz tətbiq olunmalıdır. Eyni zamanda üzr mətni Nigeriya və İngiltərədə üç milli qəzetdə dərc edilməlidir.

Qeyd edək ki, hadisə 18 noyabr 1949-cu ildə Enuqu şəhərində yerləşən İva Velli Kömür Mədənində baş verib. Ağır əmək şəraiti və maaş bərabərsizliyinə etiraz edən mədənçilərə atəş açılması nəticəsində 21 nəfər həlak olub, 51 nəfər yaralanıb.