Cənubi Koreyada 600 illik ticarət gəmisi tapılıb

Cənubi Koreyanın qərb sahillərində aparılan arxeoloji qazıntılar nəticəsində təxminən 600 il əvvəlki Joseon sülaləsinə (1392–1910) aid qədim ticarət gəmisi tapılıb.

BAKU.WS xəbər verir ki, "The Korea Herald"ın məlumatına görə, Cənubi Koreya Milli Dəniz İrsi Araşdırma İnstitutu (NRIMH) "Mado 4" adlı gəminin onillik araşdırma prosesindən sonra dəniz dibindən çıxarıldığını açıqlayıb.

2015-ci ildə Taean şəhəri sahillərində aşkar edilən gəmi ilə yanaşı, arxeoloqlar taxta etiketlər, düyü saxlamaq üçün mis qablar, məmulatlar və marşrut məlumatlarını əks etdirən taxta lövhələr də tapıblar.

Mütəxəssislər bildiriblər ki, bu tapıntı Joseon sülaləsi dövründəki bürokratik və vergi sistemləri barədə mövcud bilgiləri təsdiqləyir.

Gəmidən çıxarılan 120-dən çox artefakt hazırda "Dənizi Aşan Millətin Gəmisi" adlı xüsusi sərgidə Taean Dəniz Muzeyində ziyarətçilərə təqdim olunur.

Qalereya