Berezovskinin Britaniyadakı baxımsız qalmış qəbrinin şəkli yayıldı

Rusiyalı sahibkar Boris Berezovskinin baxımsız qəbrinin şəkli yayılıb.

Bu barədə Böyük Britaniyanın Sürrey qraflığında yerləşən "Brookwood" qəbiristanlığında çəkilmiş şəkli jurnalist Aleksey Venediktov özünün teleqram kanalında paylaşıb.

"Boris Berezovskinin qəbrini ziyarət etdim. Təəssüf..." – deyə 69 yaşlı Aleksey Alekseyeviç qeyd edib.

Fotoda jurnalist 90-cı illərin ən nüfuzlu iş adamlarından biri olan Berezovskinin məzarı üzərində bitən otların içində oturmuş vəziyyətdə əks olunub. Məzarda sadə formalı bir başdaşı da görünür.

Qeyd edək ki, Boris Berezovski sovet və rusiyalı sahibkar, dövlət xadimi, riyaziyyatçı alim və professor olub. O, 23 mart 2013-cü ildə müəmmalı şəraitdə dünyasını dəyişib.

Aleksey Venediktov – jurnalist, tarixçi, pedaqoq, televiziya və radio aparıcısı, media meneceridir. 1990-cı ildə "Exo Moskva" radiosuna müxbir kimi gəlib, 1998–2022-ci illərdə isə həmin radionun baş redaktoru olub.