Amazon 600 min işçini robotlarla əvəz etməyi planlaşdırır

New York Times tərəfindən göstərilən daxili sənədlərə əsasən, Amazon yaxın illərdə ABŞ-də 600 mindən çox əmək yerini avtomatlaşdırma ilə əvəz etməyi planlaşdırır. Şirkətin məqsədi 2033-cü ilə qədər əməliyyatlarının 75%-ni robotların idarə etməsi ilə həyata keçirməkdir.

BAKU.WS xəbər verir ki, məlumata görə, yalnız 2027-ci ilə qədər 160 min vəzifə ləğv olunacaq. Bu plan sayəsində Amazon-un 2025–2027-ci illər ərzində 12,6 milyard dollar qənaət əldə edəcəyi, hər məhsulun göndərişində isə təxminən 30 sentlik xərclə azalma baş verəcəyi bildirilir.

Hazırda Amazon dünyada 1 milyondan çox robotdan istifadə edir və ikiayaqlı "Digit" adlı insanabənzər robotları sınaqdan keçirir.

Şirkət ictimai reaksiyaları azaltmaq üçün daxili yazışmalarda "robot" və "avtomatlaşdırma" kimi sözlər əvəzinə "inkişaf etmiş texnologiya" və ya "cobot" (insanla birgə çalışan robot) kimi ifadələrdən istifadə etməyi müzakirə edib.

Amazon sözçüsü Kelli Nantel məsələ ilə bağlı bildirib ki, sənədlər şirkətin ümumi siyasətini deyil, yalnız bir qrupun daxili baxışını əks etdirir. Onun sözlərinə görə, Amazon hələ də ABŞ-də fəal işə qəbul aparır və ilin sonuna qədər 250 min mövsümi iş yeri yaradacaq.

Nobel mükafatı laureatı Daron Acemoğlu isə xəbərdarlıq edib: "Əgər Amazon bu planı reallaşdıra bilsə, artıq ABŞ-nin ən böyük işəgötürənlərindən biri yox, iş yerlərini məhv edən şirkətə çevriləcək."