Almatı hava limanında qara görə reyslər gecikir

Almatı Beynəlxalq Hava Limanında bir neçə uçuş güclü qar səbəbindən daha gec saatlara təxirə salınıb.

Bu barədə "Kazinform" agentliyi məlumat yayıb.

Hava limanının onlayn cədvəlinə əsasən, Almatıdan Şımkent, Astana, Aktau, Atırau, Novosibirsk istiqamətində uçuşlar, eləcə də Astanadan, Şımkentdən, Aktaudan və Qızılordadan gələn reyslər bir neçə saat gecikir.

Beynəlxalq hava limanının mətbuat xidmətindən bildirilib ki, 8 yanvar tarixində çətin hava şəraiti (qar, duman) ilə əlaqədar bəzi uçuşlar gecikdirilib.

Bundan əvvəl sinoptiklər Almatıda qar yağacağını proqnozlaşdırmışdılar. Bu səbəbdən kommunal xidmətlər gücləndirilmiş rejimdə işləyirlər.

8 yanvarda 14 vilayətdə, həmçinin Astana, Almatı və Şımkent şəhərlərində fırtına xəbərdarlığı elan edilib.