ABŞ İrana gedən üç ticarət gəmisini ələ keçirdiyini açıqlayıb

ABŞ Mərkəzi Komandanlığı (CENTCOM) İrana istiqamətlənən üç ticarət gəmisinin ələ keçirildiyini açıqlayıb.

BAKU.WS xəbər verir ki, bu barədə komandanlıq X sosial şəbəkəsində məlumat yayıb.

Bildirilib ki, ABŞ qüvvələri gəmilərə marşrutlarını dəyişmək barədə xəbərdarlıq edib. Açıqlamaya görə, xəbərdarlıqlara tabe olmayan gəmilərdən biri zərərsizləşdirilib, digərinə isə xüsusi əməliyyat çərçivəsində çıxış həyata keçirilib.

Məlumatda qeyd olunub ki, ABŞ qüvvələri çərşənbə axşamından etibarən İran limanlarına daxil olan və çıxan dəniz nəqliyyatına nəzarəti yenidən gücləndirib.

Komandanlıq bəyan edib ki, Hörmüz boğazı və ətraf sularda gəmiçiliyin sərbəst hərəkəti davam edir. Bununla yanaşı, "Polad Divar" adlandırılan blokadanı pozmağa cəhd göstərən gəmilərə qarşı tədbirlərin görüləcəyi vurğulanıb.

Qeyd edək ki, məlumat ABŞ Mərkəzi Komandanlığının açıqlamasına əsaslanır. İran tərəfi isə hələlik bu iddialarla bağlı rəsmi mövqe açıqlamayıb.