Microsoft 6 min əməkdaşını işdən çıxaracaq – ABŞ-də yerləşən baş ofis də təsirlənəcək

Microsoft korporasiyası dünya üzrə təxminən 6 min əməkdaşını ixtisar edəcəyini açıqlayıb. Bu, şirkətin ümumi işçi sayının 3 faizindən azını təşkil edir. İxtisarlar müxtəlif ölkələrdə, vəzifələrdə və bölmələrdə, o cümlədən törəmə şirkətlərdə çalışanları əhatə edəcək.

BAKU.WS xəbər verir ki, şirkət bu addımı idarəetmə səviyyələrinin azaldılması və sürətlə dəyişən bazar şərtlərinə uyğunlaşmaq məqsədilə atdığını bildirib. 2024-cü ilin iyun ayına olan məlumata görə, Microsoft-da təxminən 228 min nəfər çalışırdı.

Təxminən 2 min nəfərlik ixtisar Microsoft-un Vaşinqton ştatının Redmond şəhərində yerləşən baş ofisini əhatə edəcək. Bununla bağlı yerli hakimiyyət orqanlarına rəsmi bildiriş təqdim olunub və işdən çıxarılmaların 13 iyulda başlanacağı gözlənilir.

Microsoft mütəmadi olaraq kadr strukturunu yenidən gözdən keçirir və resursları prioritet istiqamətlərə yönəldir. Ötən il də şirkət 10 min əməkdaşını ixtisar etmişdi, bu ixtisarlar arasında qulaqcıqlar və digər texniki məhsullar üzərində çalışan komandalar da var idi.

Hazırkı ixtisarların səbəblərindən biri də süni intellekt və bulud xidməti Azure üçün nəzərdə tutulan məlumat mərkəzlərinin yaradılmasına çəkilən yüksək xərclərdir. Şirkət bu maliyyə ilində bu sahəyə təxminən 80 milyard dollar xərcləməyi planlaşdırır.