Böyrəklərin funksiyasını itirməyə başladığı yaş açıqlanıb

65 yaşdan yuxarı insanlarda xroniki böyrək xəstəliyinin (XBX) inkişaf etmə ehtimalı 40–50%-ə çatır. Şəkərli diabeti olan xəstələrdə isə bu xəstəlik daha tez-tez yaranır.

BAKU.WS xəbər verir ki, bu barədə Piroqov Universitetinin ümumi terapiya kafedrasının professoru, Moskvanın baş nefroloqu Oleq Kotenko "Gazeta.Ru"ya bildirib.

Xroniki böyrək xəstəliyi – istənilən nefroloji xəstəlik nəticəsində inkişaf edən böyrəklərin funksional vəziyyətidir. Bu zaman böyrəklər qanı effektiv süzmək qabiliyyətini – təəssüf ki, geri dönməz şəkildə – itirir. Nəticədə orqanizmdə toksinlər toplanır və bədənin digər sistemlərinin fəaliyyəti pozulur.

"XBX eyni zamanda şəkərli diabetin, arterial hipertoniyanın və ya xroniki ürək çatışmazlığının nəticəsi kimi yarana bilər. İnsan yaşı da xroniki böyrək xəstəliyinin inkişafına təsir göstərir. Bunun səbəbi zaman keçdikcə böyrəklərin aktiv hissəsinin azalmasıdır. Buna görə də yaş artdıqca XBX daha çox müşahidə olunur. Müasir dövrdə isə insanlar sadəcə böyrəklərin funksional qabiliyyətinin zəifləməyə başladığı yaşa qədər yaşaya bilirlər", – deyə həkim izah edib.

Dünya statistikasına görə, hər on nəfərdən biri müəyyən dərəcədə xroniki böyrək xəstəliyindən əziyyət çəkir. Lakin bu göstərici bütün yaş qruplarında eyni deyil.

"Məsələn, 65 yaşdan yuxarı insanlarda XBX inkişaf etmə ehtimalı 40–50%-ə çatır, şəkərli diabeti olan xəstələrdə isə bu xəstəlik daha tez-tez rast gəlinir. Bu faktlar nəzərə alınmalıdır, çünki risk qruplarında xəstələrin sayı təbii ki, daha çox olur. Eyni zamanda əhalinin ümumi qocalması, şəkərli diabet və ürək-damar xəstəlikləri, o cümlədən xroniki ürək çatışmazlığı olan xəstələrin sağqalma səviyyəsinin artması XBX diaqnozunun daha çox qoyulmasına səbəb olur və gələcəkdə də artacaq. Bütün bu amillər, həmçinin daha az əhəmiyyətli faktorlar – məsələn, konservantlarla zəngin qidaların həddindən artıq qəbulu – xroniki böyrək xəstəliyini "əsrin xəstəliyi" adlandırmağa əsas verir", – deyə həkim bildirib.