İsrail baş naziri Qətərdən üzr istəyib

İsrail Baş naziri Benyamin Netanyahu HƏMAS-ın rəhbərliyinə qarşı həyata keçirilən Dohadakı son hərbi əməliyyat səbəbindən Qətərin Baş naziri ilə əlaqə saxlayaraq üzr istəyib.

BAKU.WS İsrail televiziyasının "12-ci kanalı"na istinadən xəbər verir ki, Netanyahunun Vaşinqtonda Prezident Donald Trampla görüşü zamanı Qətərin Baş naziri Əl-Tani ilə telefon danışığı baş tutub və sentyabrın 9-da Dohaya endirilən zərbələrə görə təəssüfünü ifadə edib.

İsrail Baş naziri əməliyyat zamanı Qətər təhlükəsizlik xidmətinin əməkdaşının həlak olmasına görə də narahatlıq göstərib.

Qeyd edək ki, sentyabrın 9-da İsrail Hərbi Hava Qüvvələrinin təyyarələri ABŞ-nin təşəbbüsü ilə HƏMAS-ın Qəzza zolağında apardığı atəşkəs danışıqları zamanı Dohaya bir neçə zərbə endirmişdi. Bu əməliyyat "Atəş Sammiti" adı ilə tanınır. Hadisədən iki gün sonra, sentyabrın 11-də, Qətər ərəb və islam ölkələrinin fövqəladə sammitini çağırıb.