055 213 76 73
Nəhəng çat dünyanın ikinci ən böyük qitəsi olan Afrikanı yavaş-yavaş ikiyə bölür.
BAKU.WS xarici KİV-ə istinadən xəbər verir ki, bu barədə London Geologiya Cəmiyyəti məlumat yayıb.
Bildirilib ki, Şərqi Afrika Yarığı kimi tanınan bu çuxur Qırmızı dənizdən Mozambikə qədər uzanır və uzunluğu təxminən 3500 kilometrdir.
NASA-nın Yer Rəsədxanasına görə, Afrikanın şərqindəki bu nəhəng çatla yanaşı, Somali tektonik plitəsi qitənin daha böyük və köhnə hissəsi olan Nubiya tektonik plitəsindən şərqə doğru sürüşür.
Somali və Nubiya plitələri şimaldakı Ərəb plitəsində ayrılırlar. London Geologiya Cəmiyyəti bildirir ki, bu plitələr Efiopiyanın Afar bölgəsində kəsişir və Y şəkilli yarıq sistemi əmələ gətirir.
Yeni Orleandakı Tulan Universitetinin geologiya kafedrasının müdiri və ABŞ Dövlət Departamenti Bürosunun elmi müşaviri Cynthia Ebinger bildirib ki, Şərqi Afrika yarığı təxminən 35 milyon il əvvəl qitənin şərq kəsimində Ərəbistan və Afrika Buynuzu arasında formalaşmağa başlayıb. Zamanla bu yarıq cənuba doğru genişlənərək 25 milyon il əvvəl Keniyanın şimalına çatıb.
Ebinger bildirib ki, şərq və qərb çatlarının mövcudluğu və dənizdə seysmik və vulkanik zonaların aşkarlanması Afrikanın yavaş-yavaş bir neçə xətt üzrə, ildə 6,35 millimetrdən bir qədər çox açıldığını göstərir. Mütəxəssislər, sürüşmənin ayaq dırnağı uzandığı qədər yavaş getdiyini söyləyirlər.
Afrika parçalansa, müxtəlif ssenarilər baş verə bilər. Bir ssenaridə, Somali plitəsinin böyük hissəsi Afrika qitəsinin qalan hissəsindən ayrılacaq və onların arasında dəniz yaranacaq. Bu yeni torpaq Somali, Eritreya, Cibuti, Efiopiya, Keniya, Tanzaniya və Mozambik arasında bir yerdə olacaq.