055 213 76 73
Cadu, ağ-qara magiya ilə məşğul olan bəzi şəxslər artıq öz fəaliyyətlərini ''Instagram'' vasitəsi ilə də həyata keçirirlər.
BAKU.WS Xəzər TV-yə istinadla xəbər verir ki, onlar sosial şəbəkədə səhifələr yaradıb göstərəcəyi xidmətlərlə bağlı istifadəçilərə məlumatlar verirlər. Bir sözlə, onlar özlərinə bu yolla müştəri cəlb edirlər.
Müştəri cəlb etmək üçün sosial şəbəkələrdə müxtəlif adda səhifələr yaradıblar. Həmin şəxslər bu səhifələrdə cadu, ağ və qara magiya ilə məşğul olmaları ilə bağlı məlumatlar paylaşırlar.
Bir sözlə, cadu ilə məşğul olan şəxslər özlərini bu yolla reklam edərək müştəri cəlb edirlər. Son zamanlar, demək olar ki, sosial şəbəkələrdə, xüsusi ilə də ''instagram'' sosial şəbəkəsində ''cadugər'', ''ekstrasens'' adlı səhifələrə tez-tez rast gəlinir.
Məsələn, gördüyünüz bu səhifənin 300-dən çox izləyicisi var. Səhifəni idarə edən şəxs Ağ, qara magiyə ilə məşğul olduğunu və gördüyü işlərin də 100 faiz nəticə verdiyini bildirir.
Hətta səhifələrdə izləyicilər arasında belə şəxslərə müraciət edənlər də var. Psixoloq İbrahim İbrahimov deyir ki, belə şəxslər onlara müraciət edənlərə psixi təsir edə bilirlər. Bu isə həmin insanların həyatında problemlərə gətirib çıxara bilər.
İlahiyyatçılar isə belə əməllərin yalan olduğunu, sadəcə həmin şəxslərin insanları aldadıb onlardan istifadə etmək üçün bu yola əl atdığını bildirirlər. İlahiyyatçı Ağa Hacıbəylinin sözlərinə görə, cadu ilə məşğul olan şəxslərin yanına getmək böyük günahlardan hesab edilir.
Hüquqşünaslar isə bildirirlər ki, bu, bir neçə aspektdən qanun pozuntusudur. Belə ki, sözügedən fəaliyyət dələduzluq hesab olunur və vətəndaşa dəyən zərərin miqdarına görə müvafiq məsuliyyət nəzərdə tutulub.
Bundan əlavə həmin şəxsləri öz müştərilərini psixoloji təsir altında saxlayıb onlardan istifadə edərsə, bu hal da cinayət tərkibi yaradır.