Azərbaycanda xərçəng yaradan siqaretlər açıq satışda

 

 

"Azad İstehlakçılar” İctimai Birliyindən (AİİB) BAKU.WS-ə verilən məlumata görə, Şəki şəhəri D.Bünyadzadə küçəsi (Şəki şəhəri, elektrik şəbəkə və tütün fermentasiyası fabrikinin əks tərəfində) ünvanında, "Azəri” korporasiyası (VÖEN № 3000012891) və Şəki şəhəri, Baş Küngüt kəndi ünvanında "Mehdi” firması MMC tərəfindən filtersiz siqaret istehsalına başlanılıb və artıq satışa çıxarılıb.

Tütündən istifadə məişət narkomaniyasıdır! Bütün ölkələr tütündən istifadənin azaldılması üçün mümkün olan səyləri göstərir. Hələ 2001-ci ildə Şəki şəhərində və Bakıda yerləşən filtersiz siqaret istehsal edən müəssisələrin istehsal etdiyi siqaretlərin AİİB-in təşəbbüsü ilə Londonda yerləşən beynəlxalq laboratoriyada ekspertizaları keçiriliv. Azərbaycanın çoxsaylı görkəmli alimləri, ziyalıları AİİB-in əldə etdiyi nəticələrin insanları kütləvi şəkildə ağ ciyər xərçənginə sürükləyən fəsadlarını təsdiq edərək hökumət qarşısında filtersiz siqaret istehsal edən 6-a qədər müəssisənin fəaliyyətiin dayandırılmasına dəstək verib və 2001-ci ildə Azərbaycan Respublikasının Nazirlər Kabinetinin qərarı ilə bu müəssisələrin fəaliyyəti dayandırılıb. Qeyd olunanlara baxmayaraq yenidən təhlükəli tütün məmulatının istehsalına başlanılıb. 

AİİB ictimai təşkilat olaraq dəfələrlə bəyan edib ki, hökumət tərəfindən sahibkarlıq subyektləri üçün yaradılan rahat şəraitdən sahibkarlar sui-istifadə edir və ölkənin əmtəə bazarı yerli və xarici məhsularla çirklənir, insanların sağlamlığı təhlükə altına atılır. 

"Azəri” korporasiyası və "Mehdi” firması MMC heç bir hüququ sənədi olmadan, siqaret istehsalı üçün mövcud olan AZS335-2009 standartının 5.1.1.9; 5.1.1.10; 5.1.1.11; 5.1.1.12; 5.1.1.13 bəndlərinin tələblərinə məhəl qoymadan tərkibi (təhlükəli maddələrin miqdarı yol verilən həddən çox olan) naməlum olan filtersiz "Karvan” və "Şəki” siqaretlərini satışa çıxarmaqla, əhalinin tütün narkomaniyasına tutulmasına rəvac verib. Eyni zamanda bu tip siqaretlərin narkotik çəkilməsində ən vacib vasitə olduğu da məlumdur. 

AİİB-i daim bütün növ siqaretlərin təhlükəli olmasını, marketlərin girişindən siqaret stendlərinin götürülməsini, siqaretlərin qiymətinin yüksək olmasına və daha yüksəldilməsinə (əlyetərliyin azaldılması üçün) tərəfdar olduğunu bildirərək 1 qutu təhlükəli "Karvan” və "Şəki” siqaretlərinin bazara 40 - 50 qəpik qiymətlə çıxarılmasını pisləyir və əhalinin siqaret çəkməkdən və daha təhlükəli "Karvan” və "Şəki” siqaretlərini çəkməkdən imtina etməyə çağırır!

Əhalinin sağlamlığı üçün ciddi təhlükə mənbəyi olan "Karvan” və "Şəki” siqaretlərinin istehsalının dayandırılması, satışının qadağan edilməsi üçün AİİB bu gün Azərbaycan Respublikasının Nazirlər Kabinetinə, İqtisadiyyat və Sənaye Nazirliyinə, Səhiyyə Nazirliyinə, Standartlaşdırma, Metrologiya və patent üzrə Dövlət Xidmətinə, Şəki İH-ə rəsmi müraciətlər göndərib. 

Əgər müraciət edilmiş dövlət orqanları əhalinin sağlamlığına ciddi zərbə vuran, məişət narkomaniyasına rəvac verən bu təhlükəli amilə biganə qalarsa AİİB öz beynəlxalq əlaqələrindən istifadə edib, təhlükəli tütün məmulatı istehsal edən müəssisənin fəaliyyətinin tam məhdudlaşdırılmasına nail olacaqdır. Əlbəttə bu işdə istehlakçı boykotunun əvəzedilməz vasitə olacağına da əminik!